ᑲᒥᓯᓇᒋᔭᐅᔪᑦ

ᒥᐅᕆᐊᓐ ᕗᓗᕐ

ᑲᒥᓯᓇᓪᓗᐊᑕᐅᔪᖅ

ᑲᒥᓯᓇᓪᓗᐊᑕᐅᔪᖅ ᕗᓗᕐ ᐊᓪᓚᐅᕗᖅ ᐊᒻᒪᓗ ᐃᓚᒋᔭᐅᖃᑕᐅᓪᓗᓂ ᒥᔅᑕᕚᓯᔅ ᓄᓇᖃᖅᑳᖅᓯᒪᔪᑦ ᑕᐃᑲᓂ ᓴᔅᑳᑦᓯᐅᐊᓐ. ᐊᕐᕌᒍᐊᓂ 1994, ᑲᒥᓯᓇᓪᓗᐊᑕᐅᔪᖅ ᕗᓗᕐ ᓯᕗᓪᓕᖅᐸᐅᓪᓗᓂ ᑎᒃᑯᐊᖅᑕᐅᓚᐅᖅᓯᒪᕗᖅ ᐊᒡᒍᑐᖅᓯᒪᔪᓂᑦ ᐃᖅᑲᖅᑐᐃᕕᒻᒥ ᐃᖅᑲᖅᑐᐃᔨᐅᓪᓗᓂ ᑕᐃᑲᓂ ᕗᕐᑎᔅ ᑲᒪᒻᕕᐊ. ᓄᖅᑲᓚᐅᖅᑯᖅ ᐃᖅᑲᖅᑐᐃᔨᐅᓂᕐᒥᑦ 2016. ᑎᒃᑯᐊᖅᑕᐅᓚᐅᖅᑎᓐᓇᒍ ᐊᒡᒍᑎᖅᓯᒪᔪᓄᑦ ᐃᖅᑲᖅᑐᐃᕕᒻᒥ, ᑲᒥᓯᓇᓪᓗᐊᑕᐅᔪᖅ ᕗᓗᕐ ᐃᖅᑲᓇᐃᔭᖅᐸᓚᐅᖅᑯᖅ ᒪᓕᒐᓕᕐᓂᕐᒧᑦ ᐊᒻᒪᓗ ᐃᖅᑲᖅᑐᐃᕕᓕᕐᓂᕐᒧᑦ ᒪᓕᒐᓕᕆᔨᓂᑦ. ᑲᑎᒪᔨᓪᓗᐊᑕᐅᓚᐅᖅᑯᕐᓗ ᑕᐃᑯᖓ ᑭᐅᕆᕘ−ᔨᐅᓪᑰᑕᓐ ᒪᓕᒐᓕᕐᓂᕐᒧᑦ ᖃᐅᔨᓴᕐᓂᕐᒥ. ᑲᒥᓯᓇᓪᓗᐊᑕᐅᔪᖅ ᕗᓗᕐ ᐱᔨᑦᑎᕐᓂᖃᖅᓯᒪᓕᖅᑯᖅ ᐊᖓᔪᖅᑲᐅᓂᕐᒥᑦ ᐊᒻᒪᓗ ᐊᐅᓚᑦᑎᔨᐅᓂᕐᒥᑦ ᓄᓇᖃᖅᑳᖅᓯᒪᔪᓄᑦ ᐃᖅᑲᖅᑐᐃᕕᓄᑦ ᑲᑐᔾᔨᖃᑎᒌᖏᓐᓄᑦ ᑲᓇᑕᒥ, ᑖᒃᑯᐊ ᕖᓯᒥ ᐸᓖᓯᒃᑯᑦ ᐊᖓᔪᖅᑳᖓ, ᒪᓕᒐᕐᓄᑦ ᐃᖅᑲᖅᑐᐃᕕᓕᕆᓂᕐᒧᑦ ᐃᓕᓐᓂᐊᕐᓂᕆᓂᕐᒨᖓᔪᑦ ᑲᑐᔾᔨᖃᑎᒌᖏᓐᓄᑦ ᐊᒻᒪᓗ ᒪᓕᒐᕐᓄᑦ ᐊᑐᐊᒐᐅᔪᓂᑦ ᑕᐃᑲᓂ ᕗᕐᑎᔅ ᑲᓚᒻᕕᐊ.

ᑲᒥᓯᓇᓪᓗᐊᑕᐅᔪᖅ ᕗᓗᕐ ᐅᖃᐅᔾᔪᐃᖃᑦᑕᖅᓯᒪᒻᒪᕆᑉᐳᖅ ᐊᒻᒪᓗ ᑎᑎᕋᖃᑦᑕᖅᓯᒪᒻᒪᕆᑦᑐᓂ ᐱᔾᔪᑎᓕᓐᓂᑦ ᐊᑲᐅᙱᓕᐅᕈᑕᐅᔪᓂᑦ ᓄᓇᖃᖅᑳᖅᓯᒪᔪᓄᑦ ᐊᒻᒪᓗ ᐱᔪᓐᓇᐅᑎᖏᓐᓂ. 2006ᒥ, ᓴᖅᑭᑎᑦᑎᒋᐊᖓᓚᐅᖅᑯᖅ ᓄᓇᖃᖅᑳᖅᓯᒪᔪᓄᑦ ᐃᖅᑲᖅᑐᐃᔩᑦ ᕗᕐᑎᔅ ᑲᓚᒻᕕᐊᒥ.

ᑲᒥᓯᓇᓪᓗᐊᑕᐅᔪᖅ ᕗᓗᕐ ᐊᓂᒍᐃᓂᖃᖅᓯᒪᔪᖅ ᑕᒪᒃᑮᓐᓂᒃ ᐊᓂᒍᐃᓯᒪᓪᓗᓂ ᐊᒻᒪᓗ ᒪᓕᒐᓕᕆᓂᕐᒧᑦ ᐃᓕᓐᓂᐊᕐᓂᖓᓂᑦ ᑕᐃᑲᙵ ᓯᓚᑦᑐᓴᕐᕕᔾᔪᐊᖓᑕ ᕕᒃᑑᕆᐊ.

ᒥᓯᐅᓪ ᐋᑕᑦ

ᑲᒥᓯᓇ

ᑖᓐᓇ ᐸᓂᒋᔭᐅᔪᖅ ᑯᐸᐃᒃᒥᐅᑕᕐᒧᑦ ᐊᒻᒪᓗ ᐊᓈᓇᖃᖅᑐᓂ ᐃᓐᓄ, ᑲᒥᓯᓇ ᐋᑕᑦ ᐱᕈᖅᓴᓚᐅᖅᑯᖅ ᐊᕙᑎᖃᖅᑐᓂ ᐱᓕᕆᖃᑕᐅᖃᑦᑕᖅᑐᓂ ᐊᑦᑐᖅᑕᐅᓯᒪᔪᓂ ᑕᒪᒃᑮᓐᓂᒃ ᓴᙱᓂᖃᕐᒪᕆᑦᑑᓐᓂᒃ ᐃᓕᖅᑯᓯᐅᔫᓐᓂᒃ, ᐅᐱᒋᔭᖃᑦᑎᐊᖅᑐᓂᓗ ᑭᒡᒐᖅᑐᐃᓪᓗᓂ.

ᑲᒥᓯᓇ ᐋᑕᑦ ᒐᕙᒪᓕᕆᓂᕐᒥᑦ ᐱᒋᐊᓚᐅᖅᓯᒪᕗᖅ ᐊᕐᕌᒍᑭᑦᑐᓂ ᓱᓕ, ᓯᕗᓪᓕᕐᒥ ᐊᖓᔪᖅᑳᖑᓪᓗᓂ ᑯᐸᐃᒃ ᓄᓇᖃᖅᑳᖅᓯᒪᔪᑦ ᐊᕐᓇᐃᑦ ᑲᑐᔾᔨᖃᑎᒌᖏᓐᓄᑦ ᐊᒻᒪᓗ ᑭᖑᓂᐊᒍᑦ ᒥᓂᔅᑕᐅᑉ ᑐᓪᓕᕆᓪᓗᓂᐅᒃ ᐊᕐᓇᓄᑦ ᒥᓂᔅᑕᐅᔪᒧᑦ ᒐᕙᒪᖓᓐᓂ ᑲᐸᐃᒃ.

ᑲᒥᓯᓇ ᐋᑕᑦ ᖁᕝᕙᓯᓐᓂᖅᓴᒨᓚᐅᕆᓪᓗᓂ ᑕᐃᑯᖓ ᐊᖓᔪᖅᑳᖑᓕᖅᑐᓂ ᓄᓇᑲᖅᑳᖅᓯᒪᔪᑦ ᐊᕐᓇᐃᑦ ᑲᑐᔾᔨᖃᑎᒌᖏᓐᓄᑦ ᑲᓇᑕᒥ. ᑖᓐᓇ ᑕᖃᓱᐃᑦᑑᓂᖓᑕ ᐱᓇᓱᐊᕐᓂᖓ ᐃᑲᔪᕐᓂᖃᖅᓯᒪᓕᖅᑯᖅ ᐊᕐᓇᐃᑦ ᐊᒻᒪᓗ ᖃᑕᙴᑎᒌᑦ ᐱᕚᓪᓕᕈᓐᓇᕐᓂᖏᓐᓂ L’École nationale d’administration publique ᖃᐅᔨᒋᐊᕐᓂᖃᕋᑖᓚᐅᖅᑯᑦ ᖃᐅᔨᒪᓂᕆᒻᒪᕆᑦᑕᖏᓐᓂ ᐃᑲᔪᕈᑕᐅᒍᓐᓇᖅᑐᓂᑦ ᓴᖅᑭᑎᑦᑎᓂᕐᒥᑦ ᐱᕚᓪᓕᕈᑎᔅᓴᓂᑦ ᐱᓕᕆᐊᔅᓴᐅᔪᓂᑦ ᓄᓇᖃᖅᑳᖅᓯᒪᔪᓄᑦ ᑭᒃᑯᑐᐃᓐᓇᕐᓄᑦ ᐊᑐᐊᒐᕐᓂ.

 

ᕗᕋᐃᔭᓐ ᐃᐅᓪᕝᓴᓐ

ᑲᒥᓯᓇ

ᑲᒥᓯᓇ ᐃᐅᓪᕝᓴᓐ ᐃᓕᓴᕆᔭᐅᔪᑎᖃᖅᑯᖅ B.Sc. ᐃᓱᒪᓕᕆᔨᒻᒪᕆᐅᓂᕐᒥᒃ ᐊᒻᒪᓗ LL.M. ᐱᓇᓱᐊᒐᖃᖅᑐᓂ ᒪᓕᒐᕐᓂ ᑕᐃᑲᙵ ᐋᔅᒍᑦ ᕼᐋᓪ ᒪᓕᒐᓕᕆᓂᕐᒧᑦ ᐃᓕᓐᓂᐊᕐᕕᐅᔪᒥ. ᑎᒃᑯᐊᖅᑕᐅᓚᐅᖅᑐᓂᓗ ᒪᓕᒐᓕᕆᔨᐅᓂᕐᒥ ᐋᓐᑎᐅᕆᔫᒥ ᑕᐃᑲᓂ 1994.

ᑎᒃᑯᐊᖅᑕᐅᓚᐅᖅᑎᓐᓇᒍ ᑲᒥᓯᓇ ᐃᐊᓪᕝᓴᓐ ᑭᖑᕐᕕᖅᓯᒪᓚᐅᖅᑯᖅ ᐊᐅᓚᑦᑎᔨᒻᒪᕆ ᒪᓕᒐᕐᓄᑦ ᐱᔨᑦᑎᕈᑕᐅᔪᓂᑦ ᐊᒡᒍᑐᖅᓯᒪᔪᓂ ᑕᐃᑲᓂ ᐋᓐᑎᐅᕆᔫ ᒥᓂᔅᑕᐅᕕᖓᓐᓂ ᓄᓇᖃᖅᑳᖅᓯᒪᔪᓄᑦ ᐱᔾᔪᑎᓕᓐᓄᑦ ᐊᒻᒪᓗ ᓱᓕᔪᕐᓂᐊᓂᕐᒥ. ᐃᒃᓯᕙᐅᑕᐅᑉ ᑐᓪᓕᕆᓚᐅᕆᕚ ᑕᐃᑲᓂ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᑦ ᑲᑎᒪᔨᖏᓐᓄᑦ ᐋᓐᑎᐅᕆᔫᒥ, ᑕᐃᑲᓂᓗ ᐱᓕᕆᖃᑦᑕᑐᒻᒪᕆᐅᓚᐅᖅᑐᓂ ᐊᒻᒪᓗ ᑲᒪᒋᔭᖃᖅᑐᓂ ᑭᒃᑯᑐᐃᓐᓇᐃᑦ ᐱᔾᔪᓐᓇᐅᑎᖏᓐᓄᑦ ᐱᓇᓲᑎᒋᔭᖏᓐᓂ ᐊᕐᕌᒍ ᐊᑯᓐᓂᖏᓐᓂ 2007 ᐊᒻᒪᓗ 2016. ᑲᒥᓯᓇ ᐃᐅᓪᕝᓴᓐ ᖁᑦᑎᓂᖅᓴᓂᒃ ᐃᖅᑲᓇᐃᔭᖅᑎᐅᓚᐅᕆᕗᖅ ᒪᓕᒐᓕᕆᔨᐅᓪᓗᓂ ᑕᐃᒃᑯᑎᒎᓇ ᓄᓇᖃᖅᑳᖅᓯᒪᔪᑦ ᒪᓕᒐᖏᑕ ᐱᔨᑦᑎᕈᑎᖏᓐᓂ ᑐᕌᓐᑐ ᐃᖅᑲᓇᐃᔮᖃᓚᐅᖅᑐᓂᓗ ᑭᒃᑯᑐᐃᓐᓇᐃᑦ ᐱᔾᔪᓐᓇᐅᑎᖏᓐᓅᖓᔪᓂᑦ, ᓄᓇᖃᖅᑳᖅᓯᒪᔪᑦ ᐊᒻᒪᓗ ᒪᓕᒐᓕᕆᔩᑦ ᐊᔾᔨᒌᙱᑦᑐᓂᑦ ᑭᒡᒐᖅᑐᐃᔨᓂ ᐊᒻᒪᓗ ᐃᖅᑲᖅᑐᐃᕕᐅᔪᓂ.

ᑭᒡᒐᖅᑐᐃᓚᐅᖅᑐᓂᓗ ᓄᓇᖃᖅᑳᖅᓯᒪᔪᑦ ᒪᓕᒐᓕᕆᓂᕐᒧᑦ ᐱᔨᑦᑎᖅᑏᑦ ᑐᕌᓐᑐ ᐃᐳᕐᐅᐊᔅ ᖃᐅᔨᓴᕐᓂᐅᔪᒥ, ᐊᒻᒪᓗ ᑲᑎᒪᔨᐅᖃᑕᐅᓕᕋᑖᖑᓪᓗᓂ ᑕᐃᑯᖓ ᐋᓐᑎᐅᕆᔫ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᑦ ᑲᒥᓯᓐᑯᖏᓐᓄᑦ.

ᑲᒥᓯᓇ ᐃᐅᓪᕝᓴᓐ ᐃᓚᒋᔭᐅᖃᑕᐅᓚᐅᕆᕗᖅ ᐊᒻᒪᓗ ᐃᒃᓯᕙᐅᑕᐅᖃᑕᐅᓪᓗᓂ Rotiio> tatiesᑯᓐᓄᑦ, ᑖᓐᓇ ᓄᓇᖃᖅᑳᖅᓯᒪᔪᓄᑦ ᐱᓕᕆᖃᑎᒌᓄᑦ ᐅᖃᐅᔾᔨᒋᐊᑎᖏᓐ ᑕᐃᑯᖓ ᒪᓕᒐᕐᓄᑦ ᑲᑐᔾᔨᖃᑎᒌᑦ ᖁᑦᑎᓂᖅᓴᖓᓂᑦ ᑲᓇᑕᒥ. ᑖᓐᓇᓗ ᑎᑎᕋᖅᑎᓪᓗᐊᑕᐅᓚᐅᖅᑯᖅ ᑕᐃᑯᖓ ᐱᕙᓪᓕᐊᔪᓕᕆᓂᖅ ᒪᓕᒐᓕᕆᓂᕐᒨᖓᔪᓂᑦ ᐊᒻᒪᓗ ᑭᒃᑯᑐᐃᓐᓇᕐᓅᖓᔪᓂᑦ ᐊᑐᐊᒐᖅ, ᐊᒻᒪᓗ ᐃᓕᓴᐃᖃᑦᑕᖅᓯᒪᓪᓗᓂ ᑭᒃᑯᑐᐃᓐᓇᑦ ᐱᔾᔪᓐᓇᐅᑎᖏᑕ ᒪᓕᒐᖏᓐᓂ ᐊᒻᒪᓗ ᐃᖅᑲᓇᐃᔭᖃᑦᑕᖅᑐᓂ ᓄᓇᓕᓐᓂ ᒪᓕᒐᓕᕆᔩᑦ ᐱᓕᕆᕝᕕᖏᓐᓂ ᐋᓐᓂᑎᐅᕆᔫᒥ. ᑲᒥᓯᓇ ᐃᐅᓪᕝᓴᓐ ᐃᓚᒋᔭᐅᖃᑕᐅᕗᖅ ᑯᐃᑦᓯᖕ ᓄᓇᖃᖅᑳᖅᓯᒪᔪᓄᑦ.

 

ᖃᔮᖅ ᕌᕕᓐᓴᓐ

ᑲᒥᓯᓇ

ᑲᒥᓯᓇ ᕌᕕᓐᓴᓐ ᐃᓕᓐᓂᐊᓂᕐᒥᓂ ᐊᓂᒍᐃᓯᒪᕗᖅ ᒪᓕᒐᓕᕆᓂᕐᒧᑦ ᐊᑭᑦᓯᕋᖅ ᐃᓕᓐᓂᐊᕕᔾᔪᐊᖓᓂ − ᑖᓐᓇ ᐱᓕᕆᖃᑎᒌᓐᓂᐅᔪᖅ ᑖᒃᑯᓇᙵᑦ ᓯᓚᑦᑐᓴᕐᑯᔾᔪᐊᖓᓂᑦ ᕕᒃᑐᕆᐊ ᐊᒻᒪᓗ ᓄᓇᕗᑦ ᐅᑭᐅᖅᑕᖅᑐᒥ ᓯᓚᑦᑐᓴᕐᕕᒃ. ᐃᓅᓚᐅᖅᑐᓂ ᐃᖃᓗᓐᓂ ᐊᒻᒪᓗ ᐱᕈᖅᓴᔭᐅᓪᓗᓂ ᐃᒡᓗᓕᒃᒥ, ᑲᒥᓯᓇ ᕌᕕᓐᓴᓐ ᓴᙱᓂᖃᒻᒪᕆᑉᐳᖅ ᐅᑭᐅᖅᑕᖅᑐᒥ ᐱᓇᓱᐊᖅᑎᓪᓗᓂ, ᐅᖃᕈᓐᓇᑎᐊᖅᑐᓂᓗ ᐃᓄᒃᑎᑐᑦ ᐊᒻᒪᓗ ᖃᓪᓗᓈᑎᑐᑦ. ᐱᓕᕆᖃᑦᑕᖅᓯᒪᓪᓗᓂ ᒪᓕᒐᕐᓂ ᑐᑭᓯᓂᐊᕐᕕᑯᓐᓄ, ᐊᓪᓚᑦᑎᐅᖃᑦᑕᖅᑐᓂ ᐃᖅᑲᖅᑐᐃᔨᓄᑦ ᓄᓇᕗᑦ ᐃᖅᑲᖅᑐᐃᕕᓕᕆᔨᒃᑯᓐᓄᑦ ᑕᐃᔅᓱᒪᓂᐅᓚᐅᖅᑐᕐᓗ ᐃᖅᑲᖅᑐᐃᔨᓪᓗᐊᑕᐅᓚᐅᖅᑐᖅ ᐃᖅᑲᖅᑐᐃᔨ ᕙᕗᕐᓕ ᕗᕋᐅᓐ, ᐊᒻᒪᓗ ᒪᓕᒐᓕᕆᔨᓪᓗᐊᑕᐅᑎᓕᖅᑐᓂ ᓄᓇᓕᓐᓄ ᐃᖅᑲᖅᑐᐃᕕᓐᓅᖃᑦᑕᖅᑐᓂ ᓄᓇᕗᑦᒥ ᐊᕐᕌᒍᓄᑦ ᑎᓴᒪᓄᑦ.

ᑎᒃᑯᐊᖅᑕᐅᓚᐅᖅᑎᓐᓇᒍ ᑲᒥᓯᓇ ᕌᕕᓐᓴᓐ ᒪᓕᒐᓕᕆᔨᐅᓚᐅᖅᑯᖅ ᑕᐃᑯᑎᒎᓇᖅ ᕗᐊᕐᑕᓐ ᓛᑦᓄᑦ ᔫᕐᕙᐃᔅ LLP ᑕᐃᑲᓂ ᐋᑐᕚ, ᐋᓐᑎᐅᕆᔫᒥ, ᐃᖅᑲᓇᐃᔭᖃᑎᖃᖅᑐᓂ ᐱᓕᕆᔨᓄᑦ ᐅᑭᐅᖅᑕᖅᑐᒥ, ᑖᒃᑯᐊ ᒪᓕᒐᓕᕆᔨᖃᐅᖅᑐᑎᑦ ᖃᐅᔨᒪᓂᖃᐅᑦᑎᐊᖅᑐᓂ 70 ᒪᓕᒐᓕᕆᔨᓂᑦ ᐊᔾᔨᒌᙱᑦᑐᓂᑦ ᐃᖅᑲᓇᐃᔮᖃᖅᐸᑦᑐᓂᑦ ᐅᑭᐅᖅᑕᖅᑑᑉ ᐃᓚᖓᓂ ᐊᒡᒍᑐᖅᓯᒪᔪᓃᑦᑐᓂᑦ ᐊᒻᒪᓗ ᐊᕕᑦᑐᖅᓯᒪᔪᓂᑦ. ᑲᒥᓯᓇ ᕌᕕᓐᓴᓐ ᐃᖅᑲᓇᐃᔭᖃᑦᑕᖅᓯᒪᓕᖅᑯᖅ ᐊᔾᔨᒌᙱᕈᓘᔭᖅᑐᓂᑦ ᐊᑲᐅᙱᓕᐅᕈᑕᐅᔪᓂᑦ ᐊᑦᑐᐃᓂᖃᖅᑐᓂᑦ ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖏᓐᓂ. ᒫᓐᓇᒫᖑᕋᑖᓚᐅᖅᑐᖅ, ᐃᖅᑲᓇᐃᔮᖃᓚᐅᖅᑯᖅ ᒪᓕᒐᓕᕆᔨᐅᓪᓗᓂ ᑕᐃᑲᓂ ᓇᓗᓇᐃᖅᑕᐅᓯᒪᔪᑦ ᐱᓇᓱᐊᖅᑕᐅᔪᑦ ᕿᒥᕐᕈᔨᖏᓐᓄ, ᐊᐅᓪᓚᖃᑦᑕᖅᑐᓂ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓂᑦ ᑲᓇᑕᒥ. ᐱᖃᓯᐅᑎᓪᓗᒍ, ᑲᒥᓯᓇ ᕌᕕᓐᓴᓐ ᐃᓚᒋᔭᐅᖃᑕᐅᕗᖅ ᐊᐅᓚᑦᑎᔨᐅᖃᑕᐅᓪᓗᓂ ᑐᙵᓱᒃᕕᖓ ᐃᓄᐃᑦ, ᑖᒃᑯᐊ ᑮᓇᐅᔭᓕᐅᕋᓱᒃᑎᐅᙱᑦᑐᑦ ᑲᑐᔾᔨᖃᑎᒌᑦ ᐱᓇᓱᐊᕐᓂᖃᑦᑎᐊᖅᑐᑎᑦ ᐊᑐᐃᓐᓇᐅᑎᑦᑎᓂᕐᒥᑦ ᐃᓕᖅᑯᓯᒃᑯᑦ ᐊᒻᒪᓗ ᖃᓄᙱᑎᐊᕋᓱᐊᕐᓂᕐᒧᑦ ᐱᓕᕆᐊᔅᓴᐅᔪᓂᑦ ᐃᓄᓐᓄᑦ ᑕᐃᑲᓂ ᐋᑐᕚᒥ.